登入站點

用戶名

密碼

♥♥天天敷面膜 養成好習慣♥♥ 之面膜大比拼

1已有 7783 次閱讀  2010-07-28 08:07
水魚敢認係 "面膜達人", 仲係認第二都無人敢認第一果隻
因為水魚真係好愛試同敷面膜,但同時對面膜o既要求都好高
好多面膜一試唔得就會OUT,所以留得係水魚屋企o既個個都係精英
最高峰自已囤積超過千塊(事實係過千五,不過唔好太揚),就算d衫無位放,都要讓個櫃桶出來放MASK,然後d衫就咁放哂係地下就算
真係一地都係呀,影完相要有手尾放番好擺入箱

以上區區咁少。。。。後面先係o黎料,一個衣櫃都係,最後衣櫃都無位放,o黎多個30吋大o急


點解買咁多,因為水魚囉,有時見有特價又買,新出又買,係街發水魚佬脾四又買,結果買買埋埋真係3年都用唔哂,之後有親戚朋友上o黎水魚屋企,水魚就做o左派傳單咁逐個派
市面上講得出o既牌子都用過哂,但如果要長期日日敷
就梗係搵平少少就比較化算啦
大約$5以內我都可以接受, 大家可能諗$5之內,IMPOSSIBLE
但係其實一塊MASK真係值幾多呢,一個品牌會因為佢個知名度/廣告製作會令一塊MASK價錢提高不少
所以係水魚用家角度只需要好用唔會介意塊MASK出唔出名,當然大陸的不知名牌子梗係唔買啦
MASK真係好重要,以前o既我因為皮膚敏感加上玫瑰痤瘡令到皮膚真係不堪入目
成塊面紅紅腫腫,見到都反胃囉
之後慢慢揀適合自已o既SKIN CARE,再注意皮膚水份,經常保持水潤,問題都解決了不少
當然宜家仲有少許紅印啦,水魚都要諗諗計
要經常都保持到高水份,敷面膜係一個又好又方便又持久o既方法
咁水魚就用經常敷o既各類MASK做一個比較,睇睇每種面膜o既功效係咪名符其實喇

今次水魚會就唔同o既面膜去做一次比較, 包括係:貼面度/補濕度/持久度/方便度/酸鹼度/其他功效(包括係美白/抗敏/消炎/緊緻等等。。。。。。)

水魚每晚沖完涼之後,再等30分鐘呢個油水測試
真係負分呀,為o左個測試更準確,水魚已經係2個星期無敷面膜喇



敷之前要幫面膜按摩下先,好多人都唔知敷之前其實最好係先摔一摔塊 mask,因為係市面上好多mask都係打直放,d精華就好易沉底,所以先摔一摔可以令成塊mask精華更平均,另外可以的話係屋企要將mask打平放

即將測試第一款面膜


我的美麗日記 --- 蘆薈奈米面膜
呢個牌子大家唔陌生啦,而且水魚係覺得市面上平價面膜的始祖,以前買mask閒閒地都要幾十蚊一塊,水魚係勁愛蘆薈呢個物體,唔知點解o架

如果有少少想谷暗瘡用呢個係唔錯,敷完係退紅消腫同埋係無咁易甩皮,敷完塊面係滑一滑o架,但補濕度就係一般,但測試都係爆燈o既,同埋油份較少,敷完就算唔洗面都係爽o既,酸鹼度係PH5~6合格o既,唯獨是個cutting太差了,起皺得好緊要,個咀位完全唔o台,因為呢款係舊版,因為我d舊版未用哂,所以就唔買新住喇,但聽聞新版紙膜係更貼更好o既

我的美麗日記 --- 草莓優格面膜
超香的士多啤梨乳酪味,真係有食落肚o既衝動,都係果句啦,cutting太差,起皺到呢,我都覺得樣衰,呢隻補濕就麻麻喇,以平價o黎講真係一般,個氣味真係香,敷完再訓個靚覺真係好正,美白就唔係太明顯喇,酸鹼度都係PH5~6,因為補濕同美白功效唔太明顯,而且油度太高,即係太潤喇,所以呢個回購度係零呀

森田藥妝 --- 絲瓜蘆薈保濕露面膜
一打開。。。哇。。。好勁香料味呀,唔係臭,不過香精味好重,我仲諗住絲瓜蘆薈d味係好清,但原來唔係囉,森田藥妝紙膜個cutting係唔錯,剪口位多,所以都比較fit,一拎出o黎同敷上面o既時候都不停滴滴滴
敷之前真係最好攝張紙巾先,呢張面膜紙d精華係比較水,敷完好爽,酸鹼度都係PH5~6,雖然係不停咁滴滴滴,但呢個敷完feel到皮膚真係好水,同埋個cutting好fit,所以會回購

Excellent --- 急救降紅去印面膜紙
呢個係水魚敏感or有印時必用,一敷上去涼浸浸,真係舒服死,重點仲要係$3蚊咋,之前團購了超多多多,宜家就無咁平喇,功效超好,不過衰在個cutting唔多好,太大塊了,男士敷可能係好goodfit,水魚佬係超鐘意敷呢隻,但我敷就太大了,要剪開3份敷先會fit面形,呢個退敏感o既泛紅好好,敷完可以極速回復穩定,無色無味,真係居家必備,酸鹼度係PH6~7

Dr Wu --- Microinject Whitening Mask With Fullerene RS
呢個Dr. Wu人人叫好,咁水魚咪又做下水魚囉,成$47.9/一張,都ok啦,呢個可以話係水魚用過咁多品牌最薄呀薄呀薄呀薄呀o既一張,真係薄到呢,貼服力超高呀,透到塊面o架,成包面膜完全無多餘o既精華,想搽下手都唔得呀,敷完之後無洗面,再搽上晚霜就ok喇,好爽唔笠,補濕力都不錯,呢隻係美白,但敷完唔多覺有白淨到,唔通係我太黑真係影到好樣衰呀,哈哈哈,呢個美白功效都係一般,而補水唔係太突出, 所以都唔會回購,如果下次再買都試其他款

Bio-C-Ziwi --- 遠紅外線排毒面膜
呢個係水魚第一次用,見到排毒就會心郁,個cutting真係唔得o左,好大塊,點移個位都唔o岩,如果下之再敷會先cut成3份會比較好,呢隻mask敷敷下會慢慢覺得有少少暖,作用係加速個血液循環提高個新陳代謝同增加皮膚o既含氧量去幫助肌膚延緩衰老(er.....水魚暫時都未需要住,所以唔會回購,等到我七八十啦,應該會買
)呢個精華好多,所以我都用o左o黎搽下手手腳腳,同埋精華都比較厚身,亦都比較笠,所以敷完我都要洗一洗面

Neogence 霓淨思 --- 玻尿酸補濕面膜
呢個係水魚上次去台灣必掃貨之一,點解因為水魚有朋友仔係台灣讀書,佢話呢個牌子拍得住Dr. Wu,但價錢係平好多,呵呵呵,特別係精華係好出名,好多台灣女生都會用,咁樣講一講都唔買都難,咁o岩上次有套裝做特價,所以就買o左一set返來喇,其中就係呢盒mask,剪裁位多,所以都好貼服,而紙質都係軟身舒服,精華比較濕潤,成份都係天然,用玻尿酸,天然海藻萃取物同天然燕麥精華,敷上去都係好舒服,敷完都唔使洗,按摩之後直接上晚霜就可以喇,呢個都會回購,不過就要網購或者係去到台灣先可以囉,聽聞SxSx已經有得賣喇,值得一試

廣源良 --- 茶樹清爽淨油面膜
呢幾日爆o左幾粒毒瘡,唉,食o左30粒荔枝就出事喇,無計,o拿o拿聲敷個茶樹面膜希望救得番啦,廣源良o既面膜都係第一次用,cutting超好,完全無起皺,亦都無香料味, i like it , 不過一敷上去時有少少吉吉地,但都唔會吉到好唔舒服,可以接受啦,敷完之後d毒瘡係明顯無咁紅腫,唔算係好補濕,因為呢個係消炎面膜嘛,敷完都係清爽唔笠,而且油份都比較少,好o岩夏天敷囉,回購度100﹪

Eunice --- 蘆薈舒緩清爽面膜紙
呢個牌子唔多人識,但其實好多時你地係美容院都敷緊,只係美容師唔會咁易比你見到
一d連鎖式o既美容院同健身中心附設o既美容部都係入呢個牌子,但你係呢d地方敷閒閒地都要收你$60/張,其實呢個個批發價只係$4,真係平到笑,但唔好以為佢咁平就唔好用,呢個真係平靚正之選,水魚每次囤貨都閒閒地入二三百塊,今次呢個係蘆薈,無計出o左瘡瘡真係要諗計去補救,貼面度唔算係太好,上半part都還可以,鼻以下就略嫌大塊,但有個剪裁位都可以就一就,呢隻mask除o左可以敷面,裡面o既精華係多到嘩嘩聲,有成40g,要物盡其用,水魚會將裡面o既精華用o黎搽埋頸同手腳,因為呢隻唔使過水,搽好就可以去訓喇,呢個補濕度唔錯而且又唔油唔笠,夏天用好好,如果撞o岩皮膚敏感泛紅,呢個退紅o既效果都好好,回購度85%

Eunice --- 骨膠原急救解渴面膜紙
呢個係水魚急救勁乾皮膚時o既無敵面膜,所以長期水魚都會囤貨,果陣係北海道零下3度就係一連7晚都要敷,如果唔係一定會變成甩皮乾人,呢個補濕度極好,一敷係好明顯感覺到水份係好源源不絕迫入皮膚,因為呢個係gel狀精華,所以係夏天敷都唔會好heavy,夏天水魚會特別敷前放入雪櫃30分鐘,之後再敷,真係爽YY呀,一個會令肌膚“動L"o既面膜
鹼度係PH5~6,回購度100% (水魚覺得咁多張呢張最靚 WAHkakakakakaka, 因為植o左假毛呀,不過好可惜4日後甩哂


Neutrogena --- 全效美白面膜組合
呢個係同時有精華同面膜o既組合,敷之前先將美白精華按摩係全面,之後再敷上面膜,個精華係lotion狀唔會太笠,不過份量就有不足喇,可能水魚塊面大啦,按按下唔夠用,之後再敷上個面膜紙,一打開有些少酒精味,但so far以水魚o既敏感肌問題都不大,呢個膜紙係有壓孔設計,整塊面膜o既精華都好多,可以緊貼到皮膚,剪裁位不多,咀以下就唔多貼面喇,補濕度不錯,而美白效果就暫時見唔到,但敷完皮膚就即時好滑溜,呢個敷完唔會有好多精華留係面上,會係比較乾爽,酸鹼度係PH5~6,回購度有80%


LJ --- 透明質酸水份面膜

呢個算係美容院中o既貴價牌子,整張紙膜都無剪裁位,一片過,所以敷o既時候要自已就一就喇,可以的話用較剪cut 2下會好d,眼部o既剪裁位亦都比較細,如果張開眼就唔夠位喇,仲好。。。安安心心close your eye, take a rest,一打開個鋁袋d精華gel係多到標出o黎,多到真的恐佈耶,但水魚唔會o徒搽下頸又搽下手,多到搽埋個心口,呢個面膜係無色無味,敷完都仲有勁多精華係面,所以我敷完都會按摩2~3分鐘等皮膚吸收多d,唯一唔好就係要洗面囉,呢個敷完係要洗o既,我都知d精華多到咁,唔洗唔得啦,敷完塊面都感到水潤,呢隻專係for乾性肌及敏感肌,我呢個夏天日日開冷氣真係dry爆,補濕係水魚每日必用的,雖然呢個係平時用o既貴,但係一開之後其實d精華係多到用唔哂, 鋁袋入面o既精華我會用個罌仔裝起放入雪櫃,咁樣其實可以用2次,計落都係抵,酸鹼度有PH4~5,回購度係100﹪

Elements --- Caviar Essence Paper Mask
呢個係天使之前送出的福袋中的禮物,之前上網都見過下佢個蹤影,以我所知差不多係第一代掛耳式的面膜,呢個結構好特別,面膜外側係有耳勾,分別係掛於耳上去定位,的確勾完之後係可以將個面膜拉到貼,完全無摺痕,而呢個面膜下面仲有一少部份頸膜,同時都有得掛耳,個原意係向上拉提做提昇o既效果,不過好可惜全張面膜無咩彈性,所以係好難勾到o既,水魚出埋飲奶o既力終於勾到,不過變成飛機耳,真係拉到好行下o架,而頸膜就唔勾比較好,完全無彈力o既情況下,勾完好似吊頸咁,cool到實一實透唔到氣,所以影完張相我都放番個勾,一放果下先發覺勾到好痛,怕怕
,呢個面膜覆蓋得好好,每個位置都好緊貼面部,補濕度就一般喇,夏天都還好,冬天就一定唔夠,敷完之後d精華輕輕按摩好快就吸收,完全唔笠比較清爽,敷上時都有少少涼意,夏天用好好,酸鹼度係PH5~6,回購度60% (勾到隻耳仔都紅哂喇

SKINVITALS --- 大豆Q10精華面膜 (英文名太長,真係唔知點打)
呢個係好耐之前ztyle試用中用過,之後又唔知參加咩抽獎有多一盒,呢個紙質比較硬,所以敷上面之後d摺痕都無平伏,眼以上都還好,眼以下就面膜個位置同size就麻麻喇,完全好難敷得貼,呢個面膜大概都係抗衰老,補濕程度就一般喇,敷完要快快搽上補濕用品,lotion狀o既精華唔算係太笠,敷完摸上面都係爽o既,如果偏乾人士就不太適合喇,酸鹼度係PH5~6,回購度係零,因為水魚太乾,呢個補濕度太不足了

Belleza Tropical --- 牛奶乳酸舒緩補濕面膜
呢個專係比有現微絲血管o既皮膚專用, 即係我囉
,有退紅抗敏美白去黃,一打開超香的牛奶乳酸味,敷上去時涼浸浸都幾舒服,係個膜就大張o左少少,敷埋腮位都仲得,呢個係gel精華,推開都唔會笠,水魚好怕按摩完都好笠o既面膜精華,但呢隻就無呢個問題,但敷完要洗就有少少唔方便喇,水魚懶,鐘意敷完就訓,特別好多時敷敷下就想訓,但一洗面又醒哂,所以盡量都要揀唔使洗o既,酸鹼度係PH5~6,回購度係零,因為買唔番喇,哈,呢個係之前間公司送

Heynature --- 魚腥草面膜紙
呢個牌子係韓國都算出名,係香港都有代理喇, 所以買到都唔難,魚腥草最主要係退紅去敏感抗暗瘡消炎,水魚之前都有用魚腥草,不過就係面膜粉,面膜紙就反而係第一次用,一打開,好濃o既酒精味,真係唔得o左,但為o左呢篇比拼文點都要死上去o架喇
面膜紙太硬見到摺痕係點推都唔會散,敷上去o既時候仲不停咁甩,要訓係度敷先唔會跌落o黎,仲要不停咁滴滴滴滴滴滴滴,真係超失望,$28蚊一塊比我的美麗日記更差,整體唔貼面,成塊面膜都係好水,但只係停留於皮膚表面,唔係太吸收,所以回購度係零,送比我都唔會要,好彩敷完都無咩不適或問題

Eunice --- 燕窩面膜
大家見到呢個面膜咩label都無,但唔係無牌,只係我係相熟o既公司買返來,因為呢個比某美容院做o左自已品牌,所以公司就用同料但無label再出,呢個係美容院敷要成一舊水,係呀一舊水呀,但我批入都係$5蚊雞,即刻覺得自已好醒
,呢個係最全面修護o既面膜,具有補濕/修護/美白/去皺/增強彈性/養顏,用o黎急救係一流呀,so far我自已都用o左超過5年囉,一路用開都發覺好難搵到可以媲美到呢隻,好多親戚朋友上到水魚屋企都係強搶呢款,水魚屋企隨時都有幾百塊看門口,呢個紙質都不錯好軟身,尚算貼面,可以的話將個剪裁位剪入少少更加好,拎完塊面膜之後袋入面仲有好多精華,係多到有成20g,水魚會搽身搽手搽腳,唔好o徒,而且呢個面膜係唔使過水,搽完就去訓都好方便,或者都係用罌裝起,雪入雪櫃留係第2日用,補濕度超高,乾性肌必用,酸鹼度係PH5~6,回購度100%

Konad --- Collagen Essence Mask
呢個早早就應該出文了,但一路都沒有時間配合,Konad這個牌子大家都熟識,咪就係印花甲油囉,其實佢仲有出skin care系列,都係剛剛打入香港市場,韓國出的一向都有信心,呢個mask係我敷咁多隻第2隻最薄身o既紙膜,貼服力強,敷上後都沒有摺痕位出現,完全緊貼皮膚,唯獨係開孔位比較大,有一些位置未能顧及,但問題不大,呢個mask可以話係無色無味,半gel半lotion狀o既精華,補濕力不錯,說明敷25~30分鐘,但都沒有乾,持久度好好,酸鹼度係PH5~6,回購度80%,如果趁有特價其實係非常之抵


LJ --- 100%骨膠原修護面膜

呢個水魚都唔係成日捨得敷,因為貴囉,骨膠原o既面膜水魚反而唔多,一打開就有淡淡o既花香味,同之前個透明質酸一樣,紙質都係軟身,不過差在無剪裁位,所以敷果陣一定係合埋眼,個眼位太細喇,貼服力高,膜型都唔錯,敷完呢個之後皮膚會比較有彈力,而且補濕度極高,呢隻面膜d精華好多,之前個sales就教落,係袋入面d精華可以倒出o黎用罌仔裝起,再放入雪櫃,厚敷的話可當lotion mask再敷,又或者係薄搽當精華係晚上用,wahkakakakaka......咁又多個精華,正呀,不過水魚係屋企o既精華都太多喇,呢d我用係搽手腳,呢個補水力同軟柔度都好高,而油份較少,好o岩係夏天敷,酸鹼度係PH5~6,完全合格有餘,100﹪回購

我的美麗日記 --- 紅酒多酚納米面膜
一打開好似提子味利賓納多d囉,紅酒完全唔覺呀
,呢個敷上時有少少吉吉的感覺,貼服力如之前所講,差,鼻以下係全完貼服唔到,偏大了,我的美麗日記大部份都有一個弊病,就係當敷到一半時間時,精華已經乾掉了一半,當過了7分鐘後紙膜開始乾有點硬,精華揮發度比較快,所以我通常都係敷到10分鐘就要拎走,如果再敷我怕連皮膚o既水份都會抽走,紅酒呢個敷上沒有太大的補濕力,夏天都係勉強,冬天就應該唔得喇,酸鹼度係PH5~6,回購度係零,我對我的美麗日記都係麻麻

EXCELLENT --- 紅桑梅玄米韻律面膜紙 (跳舞咩,怪名一個
係EX另一條line o既面膜紙,所有肌膚都適用,主要係補濕及滋潤,呢個面膜紙質係厚少少但就好軟身,雖然係大張少少,但比起一般面膜紙覆蓋到o既位置都多,幾乎全面都敷得哂,眼部同鼻o既剪裁位都做得唔錯,好緊貼肌膚,lotion狀o既精華無色無味,滋潤性較重,冬天敷會比較適合,而且敷完之後皮膚係明顯滑溜o左,但唔好就係呢個敷完係要洗囉,如果唔洗的話會更方便,酸鹼度係PH6~7,仍屬正常範圍之內,回購度70%,大概冬天先會囤貨

森田藥妝 --- 深層淨白補濕拉提面膜
多謝Joise送o左2塊mask比我呀,咁水魚就可以多2個款寫文喇,呢隻水魚之前係極想買,因為森田藥妝個紙膜好o岩水魚個面型,但面對屋企個千幾塊面膜,水魚真係買唔落手,再買屋企實趕我出門口訓, 呢個紙膜質地不錯,但同之前試果個森田紙質不同,而全塊面膜都只係得一個剪裁位,不過因為整塊紙膜都有彈力,所以貼服力都好強,唔會有起皺情況,gel狀精華吸收得快,剩餘o既精華都好多,可以搽埋頸,補濕度還可,夏天敷都沒有大問題,冬天就唔得喇,酸鹼度係PH5~6

Eunice --- 熊果素美白補濕面膜紙

呢個係水魚用呢個牌子第一個款o既面膜,大概都用o左有5年囉,而一路都有敷,不過就真係要睇咩季節喇,一打開好香o既牛奶味,原來熊果素係似牛奶味 (如果太多牛奶味,朱古力味無訂企)因為呢個精華係屬lotion,會比較滋潤,所以水魚鐘意冬天敷多d,因為補濕滋潤功效比較重,但呢個美白功效係水魚面膜之冠,咩叫一敷即白,就係呢d喇,佢唔會好誇咁敷完會變白,而係敷會面色個tone會均勻o左同埋明亮o左,有時捱完夜好暗淡的話敷呢個係好GOOD,試過一個星期7日敷呢個真係可以白到一度,呢個敷完都係唔需要洗,但因為太潤o既關係,水魚會用有爽膚水o既棉花抹一抹先,之後再搽晚霜,呢個敷完之後皮膚會明顯係滑o左,而紙質都係不錯o既,好軟身好滑,貼服力都好高,酸鹼度係PH5~6,回購度100﹪

水感肌 --- 群馬縣茗荷面膜

專為乾性敏感肌而設,包裝鋁袋太細,一撕開差d連面膜紙都撕爛埋,面膜紙係網紋織布,不過水魚覺得太“鞋”喇,整張面膜紙剪裁位比較多,不過因為網紋織布同精華液不多所以不太貼服,大約敷5分鐘已經覺得有少許乾,補濕力唔得,反而油份較高,整體都唔乎合水魚要求,敷完仲要有d痕同敏感,所以不多講,零回購

Eunice --- 清酒酵素去斑面膜紙

都係向公司訂購啦,不過水魚好少會囤呢一隻,因為好好彩水魚無斑,(個天好公平o架,無塊面無斑,就梗會有暗瘡,哈哈哈哈。。。。。。)但去下暗瘡印就要用下喇,去斑效果水魚真係講唔到比你地聽,但去印係的確唔錯o既,我平均隔日敷的話,一般好深o既印都可以2個星期之內KO,補濕度都可以o既,所以敷完之後都唔需要搽好補水o既產品,因為呢個gel狀精華都好補濕,按摩之後搽番個晚霜就可以,呢個面膜紙貼服力都係好好,唔會點起皺(不過我係搞屎棍一派,表情多多)因為精華比較多,所以我都係會雪入雪櫃之後再敷,涼浸浸呀消暑一流,同埋一定一定會搽埋手腳,水魚對手永遠都黑過塊面,對比太大喇,睇o黎水魚要幫對手美白先得喇,酸鹼度PH5~6, 回購度80﹪(都話水魚無斑囉

Regene --- 瞬白卸黃面膜
呢個係書展殺返來的戰利品,又係掛耳式的面膜,所以好想試,呢個掛耳做得不錯,雖則個面膜紙無咩彈力,但掛耳個位做得好, 所以勾到耳仔都唔會痛,一拉就將個面膜拉到貼,但一打開就聞到d怪味,好似係擺o左幾日o既洗米水咁,有少少難頂,可能係米糠發酵味(後面有寫呢個成份),不過呢d味水魚就真係麻麻喇,呢個精華液不多,所以一拎出來水魚都覺得個膜紙有少少乾,可能之前水魚一向都敷開勁多精華o既面膜,所以覺得呢個有些少不足,敷5分鐘左右已經覺得乾,所以係敷唔到呢個說明所寫o既25~30分鐘,補濕度奇差,而油份而高,所以水魚都係零回購,好在呢盒唔使錢o者

好。。。。到最後一塊面膜喇,終極一試
SK2 --- Facial Treatment Mask
咁貴o既mask係咪真係會勁d o架呢
呢隻水魚都係第一次敷, 未敷之前有d擔心,SK2咁勁會唔會敏感呢?一打開原來係無咩味,原過張紙就真係比較厚同硬o左dd喇,好難先可以推到平推到貼面,係水魚敷咁多款最硬o既一款,所以唔算係太貼面,而剪裁位唔多,好勉強先敷到貼,整塊精華量都不多,都係剛剛好,敷完感覺都尚可,未至於好水潤,都唔亂有咩特別,可能呢個要日日敷先有效呢,但水魚敷完之後都覺皮膚係滑o左o既,其他就暫時唔見有咩特別喇,敷多幾次先,呢個都唔平,但又唔算太適合我,所以暫都不會回購







希望大家唔會比我呢d鬼樣嚇親啦
睇哂咁大篇文,真係要比個叻你地呀

媽屎真係水魚每日不可或缺的美容聖品,咩都可以無,媽屎唔可以無
水魚有今時今日的皮膚真的得來不易,因為試過慘遭滑鐵盧,所以如今真係要更加珍惜,雖然又耐唔耐復發,唉。。。。係香港零壓力真係無咩可能囉
“士堅士堅,你乖乖地哦,我每日用媽屎餵飽你就唔好作反喇“

LOVE ME   LOVE MYSELF
天天敷出好心情

水魚小貼士 1: 如果皮膚狀態好唔穩定, 建議密保式敷一個星期, 好快就會見效有改善,當然要搵隻o岩自已o架啦

水魚小貼士 2:如果係好難吸收的絲打,經常都成人聽到有人話呢隻唔好果隻唔好, 敷完等於無敷,咁你事前做足未先?如果角質層厚,比燕窩你敷都無用啦,咁唔該你先做去除角質層呢步,可以用磨砂或者係peeling,之後再敷上面膜,如果時間許可就唔該加埋個軟膜粉喇,如果無都唔緊要,可以敷上面膜紙之後再放上保鮮紙,再放上熱毛巾去將面膜的養份迫入皮膚,萬試萬靈呀

水魚小貼士3:冷敷熱敷大不同 : 冷敷同熱敷究竟有咩唔同呢
咩時候要冷敷咩時候又要熱敷呢以水魚多年o既經驗,冷敷係for鎮靜退紅退敏感時用,敷之前可以將面膜放入雪櫃雪30分鐘,唔好放係冰格呀,雪得太凍都會傷到皮膚o架,如果你日曬之後皮膚又紅,又或者係突然泛紅敏感有粒粒,冷敷係一個可以快速鎮靜到o既方法,係夏天冷敷又真係好爽YY o架。而熱敷呢就係敷上面膜紙之後,可以再放上保鮮紙及熱毛巾,但水魚有電子熱膜,直接放上去就可以喇,如果有絲打皮膚一向係好難吸收就要用熱敷,又或者係好乾乾到甩皮都可以用熱敷將精華迫入皮膚同軟化死皮,但如果敏感肌就盡量都唔好熱敷喇,因為加快o左血液循環,敏感會嚴重o左o架

水魚如果唔係去夜街每晚都係乖乖地係屋企敷面膜紙 + 面膜粉,無他o既,當你敷o左一個星期就知咩事,呢d講都係唔係咁易明白當中o既神奇之效,你地跟呢個方法敷o左一個星期就知水魚無點你喇,
 好多blogger都有跟水魚呢個方法去敷,個個都讚不絕口,而且又平又有效,面膜紙$4 + 軟膜粉$1,每晚都只係用$5蚊咋wow,  敷完真係滑o都o都o架




呢篇文水魚為o左試o左咁多款面膜,打o左成3個月o架喇,真係落足心機打o架(其實屋企仲有好多款,不過真係夠喇,日日都係打住呢一篇真係人都癲
)真係未試過有篇文係要打咁耐,希望大家多多支持推推推啦

發表評論 評論 (2 個評論)

  • queenielei 2010-07-28 09:29
    犀利不過我想問下如果cream mask果d可5可以日日full ga???我比較少用paper mask~
  • Water_Fish 2010-08-04 01:02
    queenielei: 犀利不過我想問下如果cream mask果d可5可以日日full ga???我比較少用paper mask~
    反而cream mask我唔會每日敷,因為paper mask裡面全部都係精華,而cream mask入面有可同的成份,但只有些少係精華,所以cream mask我只會係一個星期敷一次就夠,同埋cream mask相對都比較潤
塗鴉板