今日同姪女童童慶祝生日，大小姐揀勻日本菜、意大利菜、德國菜都唔啱心水，最終原來想食buffet，可能小朋友都係鍾意走嚟走去揀嘢食啩！反而我自己對食buffet就冇乜興趣，因為覺得啲嘢唔特別好食，而且自己又食得唔多，無謂怕蝕底夾硬食辛苦自己個胃，所以我零願用同等價錢，食餐好味又有人serve ge晚餐。不過今日壽星女話事，冇計啦！
喺網上search咗一輪，決定揀咗尖沙咀海港城ge太子酒店香味屋，因為評語唔錯，而且價錢合理，喺openrice download埋coupon仲有8折優惠，原本$348一位，折咗之後加埋一都係$300蚊多d，within budget，朴鎚！
原來今晚ge buffet有個主題叫「龍情盛燕」，即係主打有龍蝦同燕窩，聽落真係幾吸引。食完之後亦冇失望，食品種類多，食材都幾新鮮，味道亦不俗，環境、service都幾好，以咁ge價錢嚟計真係相當唔錯。最難得係一家人能夠開開心心咁聚埋一齊，同姪女慶祝生日之餘，又可以乘機大刷一餐，認真大滿足！
因為仲係新正頭, 所以餐廳都佈置得好有新年氣氛。
心水推介──生蠔&龍蝦仔
D蠔夠大隻亦好新鮮, 而且refill得好快, 真係食到你唔食!
熱身菜, 冇乜特別, 不過不失, 但隻螺肉超難食, 勁重梳打粉味, 全餐至bad!
龍蝦海鮮湯, 有半隻龍蝦, 都幾大隻gar, 你睇隻箝就知!
隻龍蝦仲超多膏添, 好食到唔記得膽固醇爆標!
飽肚之選──印度烤雞、各式咖哩、薄餅。
是夜媽咪唔多舒服, 所以一到場就話要食粥, 呢碗燕窩魚翅鮑片粥, 我覺得淡咗d, 佢就話啱啱好。
女孩子最喜愛ge甜品, 呢度都有唔少選擇, 由最基本ge cheese cake、tiramisu、各式蛋糕, 到啫喱奶凍梳乎里, 以至木桶豆腐花芒果黑糯米朱古力噴泉都有齊, 定能填滿你另一個胃。
話明係燕窩自助餐, 當然唔少得各款加入燕窩ge甜品, 個人比較欣賞燕窩雪梨紅棗糖水, 唔太甜, 好潤!
最緊要係有哈記雪糕任食, 仲有成 8款任揀, 包括冧酒提子、tiramisu 、草莓雪葩......唔會只係得D朱古力云呢嗱敷衍你, 哈記fans一定食到好滿足!
呢度仲有得俾你自製窩夫, 有云呢嗱同綠茶兩隻味選擇。
童童親手造的窩夫, 個樣雖然麻麻地, 但佢玩得好開心!
發表評論 評論 (6 個評論)