上星期六途經尖咀天星碼頭外，呢度一向人氣沸騰、人丁旺盛、人來人往......總之就多人啦，加上經常有街頭賣藝者表演，所以成日都聚集咗好多人，不過多數都係啲外國人演奏下樂器咁，驚喜不大。但今次居然發現有一班香港人喺度「表演」（要括住「表演」兩字，係因為我實在界定唔到佢哋係咪喺度表演緊？），令我不禁要駐足觀看，重忍唔住要影低一啲精采場面：
呢班奇人異士就係喺Jill Stuart呢個大廣告牌前「表演」。
首先令我凝住視線ge係呢位著住貼身背心短褲、髮線上升ge「豬肉男」(*請留意佢就黎跌出黎ge肚腩！)，仲要不斷擺出健美先生post，救命！
跟住傳來肉緊ge「技安歌聲」，以手代咪ge墨鏡金毛男時而扮深情劉華，時而變身舞王城城，唱完一隻接一隻，中間加插笑爆咀硬tag，顯然佢自己非常enjoy，圍觀聽眾唔多享受但總算得啖笑～
「歌王」後來仲李小龍上身，邊耍功夫邊獻唱一首唐山大兄，更有途人甲（紅衣後生仔）加入同佢一齊癲！
突然殺出兩個頭戴后冠、身穿旗袍ge「香港小姐」，佢哋二話不說、繞場一周之後就走埋一邊，除咗自己隻高跟鞋，開始......打小人！
全場總冠軍相信係呢位──身穿銀色tube top超短迷你裙加魚網絲襪ge「妙齡」女士，真係「靚絕全場」！見住佢不停穿梭左右行catwalk，再加埋回眸一笑，死未！
奇人異士時不時會聚集一旁，飲啖茶食個包，等候「出場」。
睇咗十幾分鐘，都唔知佢哋係乜嘢圑體，想表演啲乜？只聽到旁邊途人竊竊私語：「係咪電視台偷拍呀？」「超搞笑，睇多陣吖！」「有乜好睇，咁騎呢！」......
我喺邊笑邊睇邊諗緊佢哋搞乜之際，一位貼身背心短褲「健美男」攞住叠紙走向我說：「唔好意思小姐，阻你一陣...」心想：弊！原來又係做調查，唔通又要答冗長ge問卷？走唔甩添！點知，佢只係問咗我一個問題：「（指住眾表演者）你覺得佢哋型唔型呀？型就剔yes，唔型就剔no啦！」其實我真係好佩服佢哋ge膽量，如果問我佢哋勇唔勇，我必定剔yes，但講到型嘛......「健美男」見我最終剔咗no都仲滿面笑容，仲話唔緊要gar，真心剔就得gar喇，搞到我有啲唔好意思添！
「健美男」見我最終剔咗no都仲滿面笑容，仲話唔緊要gar，真心剔就得gar喇，搞到我有啲唔好意思添！究竟呢班人喺度搞邊科？係咪進行緊一啲有關建立自信ge training？希望有人可以話我知啦！
發表評論 評論 (3 個評論)